Shkup, shtator 2026 – Në kuadër të projektit “Komunat si nxitëse të zhvillimit të qëndrueshëm”, më 14 maj 2026 u shpall zyrtarisht Thirrja e Tretë për Projekte të Bashkëpunimit Ndërkomunal nga Programi i Kombeve të Bashkuara për Zhvillim (UNDP), në partneritet me Byronë për Zhvillim Rajonal (BZHR).
Thirrja u publikua përmes faqeve zyrtare të internetit dhe kanaleve të mediave sociale të UNDP-së dhe BZHR-së, me qëllim të sigurimit të shtrirjes dhe dukshmërisë sa më të madhe.
Në kuadër të thirrjes u dorëzuan 13 aplikime për projekte, ku u përfshinë gjithsej 26 komuna.
Procesi i vlerësimit u zhvillua në dy faza:
Faza e paraselektimit – verifikimi i përputhshmërisë administrative të aplikimeve sipas listës së kontrollit të përcaktuar në pikën 17.1 të Udhëzimeve Operative.
Faza e përzgjedhjes – vlerësimi teknik i aplikimeve bazuar në kriteret e përcaktuara në pikën 17.2, me pikë të caktuara nga ekipi i vlerësimit.
Pas përfundimit të procesit të vlerësimit, Komisioni propozoi projektet e mëposhtme për financim:
- Komuna e Çairit dhe Qyteti i Shkupit
“Çarshia e Gjelbër – Iniciativë e përbashkët e Komunës së Çairit dhe Qytetit të Shkupit për menaxhim të qëndrueshëm të mbeturinave”
- Komuna e Kumanovës dhe Komuna e Likovës
“Mekanizëm ndërkomunal për parandalim, mbrojtje dhe shpëtim në situata krize”
- Komuna e Zelenikovës dhe Komuna e Petrovecit
“Eko Raport: Menaxhim ndërkomunal i mbeturinave dhe shërbime digjitale”
- Komuna e Krushevës dhe Komuna e Krivogashtanit
“Bashkëpunim ndërkomunal për shërbime komunale të qëndrueshme”
Zbatimi i këtyre projekteve do të kontribuojë në forcimin e bashkëpunimit ndërmjet komunave, si dhe në zhvillimin e balancuar rajonal, përmirësimin e shërbimeve publike dhe qëndrueshmërinë afatgjatë.
Këto iniciativa konfirmojnë edhe një herë se bashkëpunimi ndërkomunal përfaqëson një mekanizëm kyç për ofrimin e zgjidhjeve më efikase dhe inovative në nivel lokal. Projektet e mbështetura do të kontribuojnë në përmirësimin e cilësisë së jetës së qytetarëve dhe në një zhvillim lokal më të fuqishëm, më gjithëpërfshirës dhe më të qëndrueshëm.
Thirrja është pjesë e projektit “Komunat si nxitëse të zhvillimit të qëndrueshëm”, i cili zbatohet nga UNDP në bashkëpunim me Byronë për Zhvillim Rajonal.
